Nýggj tvíkilja bygd til føroyska alifyritøku

Í síðstu viku handaði KJ Bakkafrost enn eina nýggja tvíkilju, sum nú er klár at nýta til uppgávur á føroysku alifirðunum. Nýggja tvíkiljan er bygd og serliga útgjørd til tær fjølbroyttu og krevjandi uppgávurnar, sum hoyra til dagliga arbeiðið á einum alibrúki í Føroyum.

Handanin er enn ein varði í drúgva samstarvinum millum KJ og Bakkafrost. Fyrsta tvíkiljan varð handað Bakkafrost í 1999, og síðani tá hevur KJ bygt og handað eina røð av tvíkiljum til felagið. Royndirnar frá hesum samstarvinum eru samstundis við til støðugt at menna tvíkiljurnar og tillaga tær til broyttu krøvini í alivinnuni.

Ein tvíkilja við alskyns útgerð

Nýggja tvíkiljan er 20 metrar long og 9 metrar breið og er innrættað við denti á gott arbeiðspláss, trygd og smidligar arbeiðsumstøður hjá manningini.

Stóra dekkið gevur góðar møguleikar at loysa ymiskar uppgávur kring alibrúkini. Umborð eru millum annað tveir Palfinger dekskranar – ein PK90002 og ein PK33002. Eisini er eitt 25 tons deksspæl á dekkinum, fýra 3 tons koppar og ein hydrauliskur koblingsplátuhaldari. Hetta ger tvíkiljuna væl egnaða til millum annað arbeiði við nótum, fortoyningum og aðrari útgerð á alibrúkunum.

Tvíkiljan er harumframt útgjørd við DP skipan, sum gevur manningini góðar møguleikar at halda tvíkiljuna støðuga á knattstøðu undir arbeiði.

Nógv megi umborð

Maskinorkan kemur frá tveimum FPT C16 motorum, sum hvør veitir 500 hk. Harumframt er tvíkiljan útgjørd við síðuskrúvu aftan og framman og tveimum Himoinsa 115 kvA generatorum, ið saman við aðrari tøkniligari útgerð tryggjar neyðugu orkuna og arbeiðsmegina umborð.

Tvíkiljur hava ein týðandi leiklut í dagliga arbeiðinum í alivinnuni, og krøvini til bæði útgerð, arbeiðsmegi og trygd eru vaksin nógv seinastu árini. Hetta sæst eisini aftur í nýggju tvíkiljuni, har dentur er lagdur á at skapa eitt sterkt og fjølbroytt arbeiðsamboð, sum kann loysa nógvar ymiskar uppgávur.

Við nýggju tvíkiljuni heldur drúgva samstarvið millum KJ og Bakkafrost fram. KJ takkar Bakkafrost fyri álitið og ynskir felagnum og manningini hjartaliga til lukku við nýggju tvíkiljuni og blíðan byr í komandi arbeiðsuppgávum.